Motto 2017: Belaef mit ós 't Vastelaovescircus

De beginjaore van "v.v. Boëte de Paort"

As d'n daag van gister herinnere weej ôs de ierste jaore. De initiatiefnemers um ein Vastelaoves vereiniging op te richte ware Jeu Lammen en Jan Schouren, dao is ut allemaol mei begos. Nao links en rechs mit wat minse gepraot te hebbe, beslaote zeej mit 9 minse, te weite: Jeu Lammen, Jan Schouren, Bert Maas, Bart Dijkhuis, Sjraar Braem, Chrit Leurs, Sjraar Canters, Wim Tilmans en Henk Zaayen beejein te komme in de bestuurskamer van RKSV Quick Boys. Ut beginkapitaal waas 9x fl 10-, en 2x fl 250-, van milde gaevers. 
Mit dees minse en de fl 590- woort der gestart:
Jan Schouren               Vors en veurzitter
Bart Dijkhuis                 Sikkertaris
Sjraar Braem                Penningmeister

Maar daomei ware weej d'r nog neet, weej hebbe keuninklikke goodkeuring aan gevraog en ouk gekrege. Toen woort 't zaak um minse geintresseert te kriege en
te vraoge of ze lid woele waere. Det leep geweldig. Op de iërste zitting ware al 
220 minse in de zaal. Oetverkoch!

Weej hadde toen nog gen rokkostuums of smokings. Nae, greune keele mit oranje sliepse. Det ware ouk de kleure van Boëte de Paort. Nao hieël korte tied woort d'r beslaote det die greune keele plaats meuste make veur rokkostuums. Netuurlik meuste d'r ouk mutse komme. Idderein meus zôrge veur zwarte zök en schoon en oewieje as d'r eine zien schoon neet good gepoets had of verkierde zök aan had. Dao makde ôzze sirremoniemeister van daen tied (Frans Klaassen) korte mette mei. Truuk nao hoes en zôrg maar det 't in orde kump.

Boëte de Paort waas neet allein veur eige lol en plezeer, det waas ouk neet d'n opzet van ein vastelaovesvereiniging. Ouk aan de bejaorde minse, kranke en gehadicapte woort gedach. Tot op d'n daag van vandaag brink 't Trio fruitschaole aan kranke minse in de parochie en hebbe we in de Zwanehaof ein zitting veur 55 plussers. Ouk werke weej mei aan ein zitting in de Beerendonck.
In de beginjaore hebbe we ein paar kièr ein fietsronde georganiseert veur Pater Schloosz en veur gehandicapte kinder die gaer woele paerdrieje onder 't motto "help hen in het zadel".

Noeits zulle we de oprichting vergaete van ein joekskepel beej Boëte de Paort, 
die sinds inkele jaore zelfstandig door 't laeve geit as Sjiengeleboem.

 

Dit is in 't kort de beginjaore van ôs vereiniging.

Ge begriep waal det d'r nog hiël wat miër te vertelle velt, wae wet gebeurt det nog waal ens.

Jan en Nelly Schouren

Truuk nao baove